ភ្នំពេញ៖ អគ្គមេបញ្ជាការរងកងយុទ្ធពលខេមរភូមិន្ទ និងជាមេបញ្ជាការទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានរម្លឹកថា អតីតយុទ្ធជន គ្រូបង្រៀន និងមន្ត្រីដែលបានចូលនិវត្តន៍ប្រៀបបានទៅនឹងឪពុកម្ដាយដែលបានកសាងសង្គមកម្ពុជាឱ្យមានភាពរីកចម្រើនដល់ពេលបច្ចុប្បន្ន។
ថ្លែងក្នុងពិធីសំណេះសំណាលជាមួយសមាជិក សមាគមអតីតយុទ្ធជនកម្ពុជា ព្រឹកថ្ងៃព្រហស្បតិ៍ ទី២២ ខែកញ្ញានេះ លោក ហ៊ុន ម៉ាណែត បានថ្លែងថាការយកចិត្តទុកដាក់ និងផ្ដល់ប្រាក់ចូលនិវត្តន៍ដល់អ្នកទាំងនោះគឺជាកាតាព្វកិច្ច និងសីលធម៌រវាងមនុស្សជំនាន់ក្រោយចំពោះមនុស្សជំនាន់មុន។
លោកបន្ថែមថា អតីតយុទ្ធជន អតីតគ្រូបង្រៀន និងមន្ត្រីចូលនិវត្តន៍បានធ្វើការលះបង់ជាច្រើន ដើម្បីបុព្វហេតុសុខសន្តិភាព និងការអភិវឌ្ឍន៍ រីកចម្រើនរបស់ប្រទេសជាតិ ជាអ្នកត្រួសត្រាយផ្លូវនិងកសាងមូលដ្ឋានសម្រាប់ផ្តល់ឱកាសអោយយោធិននិងមន្ត្រីរាជការជំនាន់ក្រោយអាចបន្តការងារបម្រើជាតិ បានកាន់តែងាយស្រួលនិងមានប្រសិទ្ធភាព និងជាធនធានយ៉ាងសំខាន់ ដែលពោរពេញទៅដោយចំណេះដឹងនិងបទពិសោធន៍ការងារ ដែលអាចចែករំលែកដល់អ្នកជំនាន់ក្រោយ៕
